काठमाडौं । प्रहरी महानिरीक्षक (आईजीपी) दानबहादुर कार्कीले प्रहरी कर्मचारीलाई उच्च मनोबल, दृढ प्रतिबद्धता र व्यावसायिकताका साथ राष्ट्र तथा नागरिकको सेवामा समर्पित हुन आग्रह गरेका छन्। ७१औँ प्रहरी दिवस तथा बडादशैँ, दीपावली, नेपाल संवत् ११४७ र छठ पर्वको अवसरमा शुभकामना व्यक्त गर्दै उनले प्रविधिमैत्री, सक्षम, व्यावसायिक र विश्वसनीय प्रहरी संगठन निर्माणमा जोड दिएका हुन्।
आईजीपी कार्कीले प्रहरी संगठनको प्रभावकारिता अभिवृद्धि गर्न समयानुकूल प्रविधिको प्रयोग, कार्यक्षमताको विकास र नागरिकमैत्री सेवा प्रवाहलाई प्राथमिकतामा राख्नुपर्ने सन्देश दिएका छन्। बदलिँदो सुरक्षा चुनौतीको सामना गर्दै नागरिकको जीउधनको सुरक्षा, शान्ति सुव्यवस्था कायम र कानुनको निष्पक्ष कार्यान्वयनमा प्रहरी कर्मचारी थप जिम्मेवार बन्नुपर्ने उनको जोड छ।
उनले प्रहरी संगठनलाई जनताको भरोसायोग्य संस्थाका रूपमा स्थापित गर्न इमानदारी, अनुशासन, जवाफदेहिता र व्यावसायिक आचरणलाई आत्मसात् गर्नुपर्ने बताएका छन्। नागरिकको विश्वास नै प्रहरी संगठनको सबैभन्दा ठूलो शक्ति भएकाले सेवा प्रवाहमा निष्पक्षता र जिम्मेवारीलाई केन्द्रमा राख्नुपर्ने सन्देशसमेत दिएका छन्।
अमर प्रहरीका परिवार र घाइते प्रहरीको कल्याणमा प्रतिबद्धता
प्रहरी सेवाका क्रममा कर्तव्यपालन गर्दै जीवन उत्सर्ग गरेका अमर प्रहरीको योगदानको सम्मान तथा उनीहरूका परिवारको संरक्षणलाई आईजीपी कार्कीले विशेष महत्त्व दिएका छन्। त्यसैगरी, सेवाका क्रममा घाइते तथा प्रभावित भएका प्रहरी कर्मचारीको कल्याण र आवश्यक सहयोगप्रति पनि उनले प्रतिबद्धता व्यक्त गरेका छन्।
राष्ट्र र नागरिकको सुरक्षाका लागि प्रहरी कर्मचारीले निर्वाह गरेको जिम्मेवारीको उचित सम्मान गर्दै उनीहरूको मनोबल उच्च राख्नु संगठनको महत्त्वपूर्ण दायित्व भएको सन्देश यसले दिएको छ। प्रहरी कर्मचारीको व्यावसायिक क्षमता, सेवा सुविधा र कल्याणमा ध्यान दिन सके संगठनको कार्यसम्पादन तथा नागरिकप्रतिको उत्तरदायित्व थप प्रभावकारी हुने अपेक्षा गरिएको छ।
पूर्ण शान्ति पुरस्कार एसपी अंगुर जिसीलाई, पुलिस ब्याटन डीआईजी खत्रीलाई
यसैबीच, प्रहरी संगठनमा उल्लेखनीय योगदान र कार्यसम्पादनको कदरस्वरूप प्रदान गरिने पुरस्कारमध्ये पूर्ण शान्ति पुरस्कार प्रहरी उपरीक्षक (एसपी) अंगुर जिसी र पुलिस ब्याटन प्रहरी नायब महानिरीक्षक (डीआईजी) भूपेन्द्र खत्रीलाई प्रदान गरिने भएको छ।
प्रहरी दिवसका अवसरमा प्रदान गरिने यस्ता पुरस्कारले संगठनभित्र उत्कृष्ट कार्यसम्पादन, जिम्मेवारीप्रतिको निष्ठा र व्यावसायिक प्रतिबद्धतालाई प्रोत्साहन गर्ने अपेक्षा गरिएको छ। पुरस्कारले प्रहरी कर्मचारीलाई आफ्नो जिम्मेवारी अझ प्रभावकारी ढंगले निर्वाह गर्न प्रेरित गर्नुका साथै संगठनमा उत्कृष्ट कार्यसंस्कृतिको विकासमा योगदान पुर्‍याउने विश्वास गरिएको छ।
७१औँ प्रहरी दिवसले प्रहरी संगठनको गौरवपूर्ण इतिहास, अमर प्रहरीको बलिदान र वर्तमान सुरक्षा चुनौतीबीच नागरिकको सुरक्षाप्रतिको प्रतिबद्धतालाई पुनः स्मरण गराएको छ। प्रविधिको विकाससँगै बदलिँदै गएका अपराधका स्वरूप र सुरक्षा चुनौतीको सामना गर्न सक्षम, पारदर्शी र नागरिकमैत्री प्रहरी संगठन निर्माण आजको आवश्यकता बनेको छ।
आईजीपी कार्कीको सन्देशले प्रहरी कर्मचारीको मनोबल अभिवृद्धि, संगठनात्मक सुधार, प्रविधिको प्रभावकारी प्रयोग र प्रहरी परिवारको कल्याणलाई एकसाथ अघि बढाउनुपर्ने आवश्यकतालाई उजागर गरेको छ। नागरिकको विश्वास जित्दै कानुनको शासन र शान्ति सुरक्षाको प्रत्याभूति दिलाउनु नै प्रहरी संगठनको प्रमुख दायित्व हो।